All Cards
Total Cards: 430 |
Page: 2 of 22 |
Showing: 20 cards
410. සොබා දහමේ දානය
- ගසක් යනු නිර්වාණය සඳහා ගුරුවරයෙකි, කල්යාණ මිත්රයෙකි, සේවකයෙකි, දන්පතියෙකි
- ගසකින් යැපෙන බොහෝ ජීවීන් සිටි. කුරුල්ලන්, ලේනුන් ආදී සත්වයන් සඳහා ආහාර නිවාස සහ ආරක්ෂාව සෙවන ආදිය සලසන්නේ ය
- බත් පාන් කව්පි මුං ඇට ආදී ආහාර ගැනීම මගින් සිදුවන්නේ ආහාර වල ශක්තිය පවතින යම් කාලයක් සඳහා සත්වයාගේ මරණය කල් යෑමයි
- එලෙසම පිරිසිදු වාතය යනු ද ආහාරයකි. එයින් ද සිදු වන්නේ සත්වයාගේ මරණය හුස්ම වාරයෙන් හුස්ම වාරයට කල් යෑමයි
- මෙලෙස ගෙඩි මල් නොහැදෙන ගසක් වුවද පිරිසිදු වාතය ආදී ලෙස ලෙස දන් වැටක් පවත්වාගෙන යන්නේය
- එයට වතුර පොහොර ආදී ලෙස යම් සත්කාරයක් කළ හැකි නම් එම දන් වැට සඳහා අපගේ දායකත්වය ලැබෙන පින් වැඩෙන කටයුත්තකි
- තවද ගසක්, පොතු කොළ මල් ගෙඩි ආදිය උපයෝගී කරගනිමින් විශාල නිහඬ ධර්මයක් නිරූපණය කරයි
- අටලෝ දහමින් කම්පා නොවීම, නිහතමානීකම, නිශ්ශබ්දභාවය, අකම්පිත බව ආදී බොහෝ ගුණයන් ද මෙම ධර්මතාවය සතුය
- මෙලෙස ගසක් වුවද නිර්වාණය ළඟා කර ගැනීම සඳහා අගනා වටිනා කමටහනකි
No audio available
409. ධර්ම බීජය
- සියල්ලට ප්රමුඛව ධර්ම බීජය රෝපණය කළ යුතුය
- උදාහරණයක් ලෙස පැලයක් සිට වූ විට අපගේ විශේෂ අවධානයක් නැතත් පැය විසිහතර පුරා එය අඛන්ඩව වැඩෙන්නේ ය
- නමුත් මුල් කාලයේ අව්ව, වැස්ස, පොළොව ආදියට ඔරොත්තු දෙනතුරු පැළය රැක බලා ගත යුතුය
- කල් යත්ම ශක්තිමත් පොත්ත, කොළ, මල්, ගෙඩි ආදිය ද ගහේ ආරක්ෂාව පිණිස පවතින්නේය
- ධර්මය ද එසේය. මුලින් බොහෝ ප්රවේසම් විය යුතුය. කල්යත්ම සීලය සමාධිය ප්රඥාව අත්දැකීම් ඒවායේ ආනිසංස ආදිය මගින් ස්වයං ආරක්ෂාවක් සැලසෙන්නේ ය
- වැඩුණු ගසක් බිම දැමීමට මුලින් එහි අරටුව බිඳ දැමිය යුතුය. නමුත් කුඩා පැලය කාලයේ මෙන් එය පහසු කාරියක් නොවන්නේය
- එලෙසම ධර්මය වැඩුණු විට ඒ තුළද අරටුවක් මෙන් අටලෝ දහමින් කම්පා නොවන මානසික මට්ටමක් පවතින්නේ ය. පහසුවෙන් මාර ධර්මවලට යට නොවන්නේය
- යම් හෙයකින් ගසකට හානියක් සිදුවුවද පැතිරී ගිය මුල් පද්ධතිය හරහා නැවත ගස ලියලීම ට බොහෝ අවස්ථාව ඇත්තේය
- එලෙසම ධර්මය වෙනුවෙන් කාලය ආයෝජනය කල විට නිර්වාණය පිණිස බොහෝ හේතූන් සකස් වන්නේය. මතු යම් දිනයක ඒවා යහපත පිණිසම වන්නේය
No audio available
408. සැප සමග පැමිණෙන දුක
- සැපය යනු භාග්යයකි. බොහෝ දෙනා ප්රාර්ථනා කරන කාරණයකි
- ලැබුණොත් සැපයකි, සතුටකි. නොලැබුණොත් කනස්සල්ලකි, දුකකි
- මිනිසෙක් ගෙදරට කැමැත්තෙන් කුණු රැගෙන එන්නේ නැත
- භාණ්ඩ මිලදී ගැනීමේදී අවශ්ය වන්නේ භාණ්ඩය පමණක් වුවත් නිරායාසයෙන් ඒවා සමඟ කුණුද, අනවශ්ය බොහෝ දේ ද පැමිණීම සිදුවේ
- යම් සැපයක් ලබා ගැනීම සඳහා වෑයම් කරන විට එම සැප හා බද්ධව දුක ද පැමිණීම සිදුවේ
- රූප බැලීමට අපට තබාගත යුත්තේ රූපවාහිනියේ තිරය පමණි. නමුත් අකමැති වුවත් ඒ හා වයර් කැබිලි, සර්කිට්, ප්ලාස්ටික් වැනි දේ බද්ධව පවතී
- ඥාති හිත මිත්රාදීන් සැපයක් ලෙස පෙනුනද ඒ හා ද දුක බද්ධව පවතී. වියෝවක දී ඒ බව හොඳින්ම දැනෙනු ඇත
- සැපයක් ඊට වඩා සැපයක් හා සලකන විට එම සැපයද දුකකි. සෑම සැපයක් හා ආදීනව ද බැඳී පවතී
- මේ ආකාරයෙන් සලකන විට සැපයද ඒකාන්ත දුකකි
No audio available
407. පරම වූ ධනය
- ධනය යන වචනය තුළ අර්ථ ගැන්වෙන්නේ ලෞකික ලෙස මිල මුදල් ය
- ධනය ඇත්නම් එය වියදම් කර තම අවශ්යතාවයන් උවමනාවන් ඉටු කර ගත හැක
- නමුත් මෙම ලෞකික ධනය ඕනෑම අවස්ථාවක අන්සතු විය හැක. එම නිසා එය නියම ධනයක් නොවේ
- අපට යම් ධනයක් ඇති විට එය වියදම් කර සෘජුව හෝ වක්රාකාරව සිදු කරන්නේ සතුටක් ලබා ගැනීමයි
- උදාහරණයක් ලෙස ධනය වියදම් කර ලබා ගන්නා පහසුවක් යනු සිතට සතුටකි
- එම නිසා සතුට සෘජුවම ලැබෙන්නේ නම් එය පරම වූ ධනයකි
- ශ්රද්ධාව යනු බුදුරජාණන් වහන්සේ කෙරෙහි, උන්වහන්සේ පෙන්වා දුන් ධර්මය කෙරෙහි, ආර්ය මහා සංඝරත්නය කෙරෙහි ඇති පැහැදීම හා විශ්වාසයයි
- තවද එම ලෝකෝත්තර ධනය ඇති විට ලැබෙන්නේ සංසාර කෙළවර සහ අර්ථ දැක්වීමක් පවා සිදුකළ නොහැකි සැපයක් ඇති නිර්වාණයයි
- එම නිසා මිල කල නොහැකි නිවන ලබාගත හැකි පරම වූ ධනය ශ්රද්ධාවයි
No audio available
406. මළ ගෙදර
- මළ ගෙයක් අප කවුරුත් ප්රාර්ථනා නොකරන කාරණයක් බව දුක් වීමෙන් හඬා වැලපීමෙන් තහවුරු වේ
- මළගෙවල් අපට හුරුපුරුදු කාරණයකි, නමුත් අපද මරණයට පත්වන බව වැටහෙන්නේ සහභාගී වන පිරිසෙන් ඉතා අල්ප පිරිසකටය
- නමුත් දුක් විය යුත්තේ මෙම කයෙහි මරණය පිළිබඳව නොව ක්ලේශයන් ගේ ජීවත්වීම පිළිබඳවය
- මක්නිසාද සසර දුක්ඛයන් පැමිණෙන්නේ කයෙහි මරණය නිසා නොව, ක්ලේශයන් ගේ ජීවත්වීම නිසාය
- කයෙහි මරණය අප හට දුකකි. නමුත් ක්ලේශයන් ගේ මරණය සතුටකි
- තවද මළගෙදරක සෑම අයෙක්ම හඬා වැළපෙන්නේ නැත
- බොහෝ විට හඬා වැළපෙන්නේ මියගිය පුද්ගලයා පිළිබඳව අනුකම්පාවකින් නොවේ
- තම වාසියක් අහිමිම, රැකවරණයක් අහිමිවීම වැනි යම් හේතුවක් පාදක කර ගනිමින්ය. එම හඬා වැලපීමට දක්වන හේතු සාධකයන් විමසා බැලූ විට විහිළු සහගතය, පදනම් විරහිතය
- පිරිසක් හැඬීමටත්, පිරිසක් නොහැඩීමටත් පවතින හේතුද, හැඬීම ඇති කරන චෛතසික, හේතු සාධක විදර්ශනා කළ කළ යුතුය, එවිට හැඬීම ක්රමානුකූලව දුරු වී විශාල ධර්මයක් මතුවනු ඇත
No audio available
405. අවදානම සහ රැවටීම
- අපට ඇත්තේ කල්ප ගණනක් මුළුල්ලේ ක්ලේශයන් තුල බැසගත් සිතකි
- බොහෝ කාලයක් තිස්සේ රැවටුණු සිතකි. රැවටීමෙන් තෘප්තිමත් වන සිතකි. තවද ක්ලේශයන් මෙම සිතට ජප වී ඇත
- එයට ඇති ප්රබලම සාක්ෂිය මේ ජීවිතයේ ද අප උත්පත්තිය ලබා තිබීමයි
- මෙසේ රැවටුණු ක්ලේශයන්ටම භාවිතා වුනු සිතක් මේ ජීවිතයේ අපිට යහපතක් සිදු කරන්නේ යැයි සිතිය නොහැක. බොහෝ විට මේ මොහොතේ ද අප ඇත්තේ රැවටීමක් තුළය
- තවද වැඩිම අවදානම ඇත්තේ මේ ජීවිතයේ ද නිවන මගහැරී යාමටයි
- එම නිසා එය වැළැක්වීමට ගත හැකි සෑම පියවරක්ම ගත යුතුය. නොයෙකුත් ආකාරයෙන් උපක්රම යෙදිය යුතුය
- ගවයෙකුගේ පිටේ ගැටගැසූ දණ්ඩක් මත තණකොළ බැඳ ඇස් ඉදිරියට පෙනෙන ලෙස සැලැස්වූ විට, එය අඟල් කිහිපයක් වුවත්, පහසු ලෙස වැටහුනත්, කිසි දිනක එය වෙත ළඟාවිය නොහැක
- එලෙසම නිර්වාණයද අත ළඟ ලෙස වැටහුනද මුලාවන් නොවැටහෙන තුරු නිර්වාණයද ළඟා වන්නේ නැත. තම උපරිම උත්සාහය යොදවා සසරට කොටුවී ඇති මුලාවන් හඳුනාගත යුතුය
- සෑම දිනකම මනුසත්වය දුර්ලබ ලෙසද, බුද්ධත්වය දුර්ලභ ආදී ලෙසද නොයෙක් ධර්මයන් මෙනෙහි කරමින් වීරිය ඉපදවිය යුතුය
No audio available
404. හඹා යෑම
- හඹායම් වර්ග කීපයකි. ඇතැම් අය ලෞකික ජීවිතයට ගොඩක් සමීප වචනයක් ලෙස නිර්වචනය කරයි
- සමහර අය රස්සාවේ තනතුරු හඹා යති, සමහරු ඉගෙනුම ආශ්රිතව උපාදී පසුපස හඹා යති, සමහරු රසවත් කෑම වර්ග හඹා යති. සමහරු ඇඳුම් පැළඳුම් ආදිය හඹා යති.
- සමස්තයක් ලෙස ගත් කල ජීවිතයේ ඇත්තේ හඹා යෑම් පමණකි
- හඹායෑම හුදෙක් ලෞකික පැත්තට ගෝචර වූවද ලෝකෝත්තර හඹා යෑම් ද පවතී
- සමහර අය මාර්ගඵල හඹා යති
- සමහර අය ධර්මයද හඹා යති. හුදෙක් සූත්ර දේශනා ආදිය ද හඹා යති
- ලෞකික හඹා යෑම දුක හට ගැනීමට සෘජුව බලපාන සාධකයකි
- ලෝකෝත්තර හඹා යාම යම්තාක් සාධාරණීකරණය කළ හැක
- නමුත් ලෝකෝත්තර වේවා, ලෞකික වේවා, හඹායෑම නිවනට ප්රතිවිරුද්ධ ධර්මයකි
No audio available
403. දුකටම උපන් කය
- නිරතුරුව පොළොවේ ගැටී ජීවත් වීමට මනුස්සයාට සිදුවේ
- ඇටසැකිල්ලක් ඇත, වටේ මස් ඇත. ඊට පිටින් සම ඇත
- පොළොව තුළ මොන ඉරියව්වට සිටියත් ඇට සැකිල්ල සහ පොළොව අතර මස් කොටසක් තෙරපීම සිදුවේ
- මස් තෙරපීම යනු වේදනාවකි දුකකි
- එනම් කුමන ඉරියව්වෙන් සිටියද ඒකාන්තයෙන් වේදනාව හට ගනී
- එනම් මේ ශරීරය තබාගෙන එම දුකෙන් මිදීමේ ක්රමයක් නැත
- තවද මේ ශරීරය තුළ පවතින සම ඉවත්කර මස් ඉවත් කර කණ්ණාඩියක් තුළින් අපට අපගේම ඇටසැකිල්ල දැක ගත හැකි නම් තැති ගන්නේය, බියට පත්වන්නේය
- ඒ බියකරු බව මේ මොහොතෙත් පවතින අතර පිටින් පවතින සමෙන් එය වැසී පවතී
- කෙටියෙන් ගතහොත් කය භාවිතය යනු නොයෙක් ආකාරයෙන් වූ ඒකාන්ත දුකකි
No audio available
402. පුනරාවර්තනය
- කුණු පැල්ලමක් නැවත නැවත පිස දමන්නේ කුණු ඉවත් නොවූ නිසාවෙනි
- අඹ යනු නැවත නැවත ඇතිවී නැතිවී යන ක්රියාවලියකි
- ඒවා නැවත නැවත ඇති වන්නේ ඒවා ඇති වූ අරමුණ පූර්ණය කර ගැනීමට නොහැකි වූ නිසාවෙනි
- නැවත නැවත ආහාර ලබා ගැනීමට සිදුවී ඇත්තේ ආහාර ලබා ගැනීමට වූ අරමුණ පූර්ණය නොවූ බැවිනි
- මෙලෙස බොහෝ ක්රියාවලින් සිදුවන අතර ඒවා ඇතිවීමේ අරමුණ පූර්ණය නොවූ බැවින් නැවත නැවතත් සිදුවේ
- එලෙසම ඇසුණු යමක් නිවැරදිව ඇසුනේ නම් නැවත ඇසීමක් සිදු නොවිය යුතුය
- ඇසීමට වූ අරමුණ පූර්ණය නොවූ බැවින් නැවත නැවතත් ඇසීම සිදුවේ
- එලෙසම සියලු ආයතනවල වල සිදුවන හඳුනා ගැනීම් නැවත නැවත පුනරාවර්තනය වන ඒවාය
- මෙම ආයතන වලට පෙනෙන ඇසෙන දැනෙන හැඟෙන දේ පූර්ණය වූ විට නැවත පෙනීමක් ඇසීමක් දැනීමක් හැඟීමක් සිදු නොවන්නේය. ඒ සියලු දේ පූර්ණත්වයට පත්වන්නේ ය. අවසාන වන්නේය
No audio available
401. පාවඩය
- පාවඩය යනු පාවඩයක් පමණක් නොව බොහෝ ධර්මයන් අන්තර්ගත කමටහනකි
- පාවඩය පයට පහසුවක් පමණක් නොව ඇසට අලංකාරයක්, මෙන්ම නිහඬව ආදරය ගරුත්වය පිරිනැමිය හැකි ක්රමයකි
- උදාහරණයක් ලෙස එම ගරුත්වය ලබන්නේ තථාගත ශ්රාවකයකු නම් ධර්මය මැනවින් දේශනා කිරීම මෙන්ම ශ්රාවකයා තුළ මැනවින් ධර්මය ඇසීම සඳහා ද හේතු සකස් වන්නේය
- පිරිසිදු පය අපිරිසිදු පය ලෙස භේදයක් නැත. සියලු පය සඳහා පාවඩය සුවපහසුව සලසන්නේ ය
- එය දකින ශ්රාවකයාට පාවඩය නිහඬ බණක් වන අතර උදාහරණයක් ලෙස සැප දුක් නින්දා ප්රශංසා ආදිය නිහඩ ව විඳ දරා ගත යුතු බව නිරූපණය කරයි
- තවද සිතක් තුළ පාවඩයෙහි අලංකාරය මතුවන්නේ එක් කොටසකින් පමණක් නොව එහි සියලු කොටස් මනාව එකතු වූ විටය
- මේ කයද එලෙසමය, නොයෙකුත් කොටස් මනාව එකතු වී ඇති බැවින් මම ලෙස පෙනෙන්නේය, ලෙස විදර්ශනාව අවදි කළ හැකිය
- මුලින් අලංකාරව තිබූ පාවඩය භාවිතයත් සමඟ කාලයත් සමග ජරා ජීර්ණ ව යන්නේය. එලෙසම තරුණ කාලයේ අගනා වටිනා ලස්සන මෙම කය ද කාලයත් සමග දුර්වර්ණ වී ජරාවට පත් වන්නේය
- මේ ආදී ලෙස නොයෙක් විදර්ශනාවන්ට පෙරළිය හැකි පාවඩය නිර්වාණය මතුකිරීම සඳහා අගනා වටිනා කමටහනකි
No audio available
400. නොහඳුනන සැප
- සිතට අවශ්ය කරන සියලු දේ ලබාදීම සැප ද?
- සිතට සිතෙන සියලු දේ කිරීම සැප ද?
- සිත සැප ලෙස හඳුනාගන්නා සියල්ල සැප ද?
- සාර්ථක යැයි සැලකෙන මිනිසුන් අනුගමනය කිරීමෙන් වැඩ කටයුතු කිරීම, ඒවා ළඟා කර ගැනීම සැප ද?
- සිතට යම් වින්දනයක් ලැබීම සැප ද? තම සන්තකයේ ඇති සියලු දේ ඉවත් කිරීම සැප ද?
- පෙනීම සැප ද? ඇසීම සැප ද? ආඝ්රහණය සැප ද? ස්පර්ශය සැප ද? ඇත්තෙන්ම සැප යනු කුමක් ද?
- ජීවිතය පුරා සැප සොයාගෙන ගියද එම සැපය කුමක්දැයි ඇසූ විට ඊට දීමට පිළිතුරක් නැත
- සැප සොයන්නේ ආයතන පරිහරණය තුළින් නම් කිසි දිනක සැපයක් ලබාගත නොහැක
- උදාහරණයක් ලෙස පින්තූරයක් තුළ ඇති ආහාරයක් ගැනීමට දරන උත්සාහයක් වැනිය. කොපමණ උපක්රම යෙදුවත් එය කිසි දවසක සිදු කළ නොහැක
No audio available
399. සීමාව
- පරිසරය තුළ බොහෝ ශබ්ද පවතී
- නමුත් අපේ කනට ගෝචර වන්නේ එයින් ඉතා කුඩා ප්රමාණයක් පමණි. එම නිසා කන ඉතා දුර්වල ආයතනයකි
- අපට ශබ්දයක් ලෙස හසු වන්නේ කනෙහි යම් කම්පනයක් සිදු කිරීමට සමත් ශබ්දයන් පමණි. නමුත් එම ශබ්දයන් ද ගෝචර වන්නේ එක් එක් පුද්ගලයන්ගේ කන් වලට සාපේක්ෂවය
- එම නිසා දුර්වල වූ කනෙන් ලැබෙන ශබ්ද මගින් නිවැරදි නිගමනයන් සිදු කළ නොහැක
- එලෙසම අනෙක් ආයතනද බොහෝ දුර්වලය
- රූපවාහිනියක් තුළ කුඩා බල්බ හරහා ජනනය වන වර්ණ රටාවන් දුර්වල වූ ඇසට හසුවන්නේ නොයෙක් රූප, ටෙලි වෘතාන්ත ආදී ලෙසය
- එම දුර්වලතාවය නිසා ආයතන හරහා අපට ඇති දෙය නිවැරදිව නොපෙනෙන අතර නැති දෙයක් ඇති ලෙස පෙනීම සිදුවේ
- මෙම ආයතන නිවැරදි කිරීම කළ නොහැක. මේවා සකස් වී ඇත්තේ සංසාර ගමන සඳහාමය
- කළ හැකි කාර්ය වන්නේ යම් විදර්ශනාවක් තුළින් මෙම ආයතන තුළ පවතින දුර්වලතාවයන් හඳුනා ගනිමින් ඒවාට නොරැවටී සිටීමයි. නික්මීම යි. මිදීමයි
No audio available
398. පින ද ධර්මතාවයකි
- මට බොහෝ පින් ඇතැයි පැවසුවද පින ද අනිත්ය දුක්ඛ අනාත්ම ලක්ෂණ දරන ලෝක ධර්මතාවයකි
- ආර්ථික ශක්තිය හිමි මෝඩයෙකු බොහෝ කර්ම රැස් කර ගනිමින් තම ජීවිතයට හානියක්ම කර ගන්නේය
- ආර්ථික ශක්තිය හිමි නුවණැත්තෙකු තව තවත් සැපයෙන් සැපයට ම පත්වන්නේ ය
- එලෙසම අතීතයේ සිදු කරන ලද පුණ්ය ශක්තිය වුවද මෝහ සහගත පුද්ගලයෙකුට බොහෝවිට අයහපතක් සිදු කරන්නේය
- ප්රඥාවන්තයා අතීත පාපකර්මයක් වුවද තම යහපතට ම යොදවා ගන්නේය
- එලෙසම පින යනු ද තාවකාලිකව අපට ලැබී ඇති ධර්මයකි, වහා ගෙවී යන්නේය
- තවද අපගේ ශරීරයෙහි ඇති අත් කකුල් හිස ආදිය පවා ලැබී ඇත්තේ තාවකාලිකවය
- සියල්ල තාවකාලික පරිභෝජනයක් පමණි
- යම් දිනෙක මේ සියල්ල ඒකාන්තයෙන් අහිමි වන්නේය. අවසාන වන්නේය
No audio available
397. ගිනිදැල්
- ගින්නක් ඇතිකළ හැකි ආකාර බොහෝ පවතී
- ගිනි කූරක් ගිනි පෙට්ටියක ඇතිල්ලීමෙන් ගින්නක් ඇති කළ හැකිය. නමුත් ගිනිදැල් දෙස බලා ගින්න හට ගත්තේ කෙසේදැයි නිගමනය කළ නොහැක
- ගිනි ගන්නා ලද කැලයක හටගන්නා ගිනිදැල් දෙස බලා ලැව් ගින්නක් ද වෙනත් අයෙකු විසින් ගිනි තබන්න ලද්දක්ද යන බව නිගමනය කළ නොහැක
- ගින්නක් ඇත්නම් ගින්නක් ඇති බව දැන ගත හැකිය. ගින්න නිවුණු විට ගින්න නිවී ගියේ යයි දැනගත හැකිය
- නමුත් කාරණය වන්නේ ඇවිලී ඇති ගින්නක් නිවීම අරමුණ වන විට ගින්න හට ගත් සුල මුල සෙවීමට යෑම මගින් සිදුවන්නේ ගින්න නිවීම තව තවත් ප්රමාද වීමයි
- මෙමගින් සිදුවන්නේ තව තවත් හානිය වැඩි වීමයි
- එලෙසම සිත යනු ද ඇවිලුණු ගින්නකි. සිතිවිලි යනු ගිනිදැල් ය.සිත හටගත්තේ කෙසේද ලෙස සෙවීමට යෑමෙන් සිදුවන්නේ නිවීමට ඇති කාලයද අහිමිවීම යි
- එය ඇති වූයේ මෙසේ යැයි දැනගත්ත ද එය නිර්වාණය කෙරෙහි (ගින්න නිවීම කෙරෙහි) රුකුලක් වන්නේ නැත
- එම නිසා සිත හටගත් ආකාරය නොව එය පැවතීමට ඇති හේතු සොයා ඒවා නිරෝධ කිරීම නුවණැති ය
No audio available
396. තච පංචකය
- කෙස්, ලොම්, නිය, දත් හා සම් ලෙස දෙතිස් කුණපයේ පළවෙනි පහ තජපංචකය නම් වේ
- බොහෝ සත්වයන්ගේ පිටතින් පෙනෙන්නට ඇත්තේ මෙම කුණප කොටස් පහය
- සත්වයා නොයෙක් නිගමනයන්ට එළඹෙන්නේ කොටස් 32ක් ඇති තැනක කොටස් පහක් පමණක් නිගමනය කිරීමෙන්ය. එම නිසා දෝෂ සහිතය
- විදර්ශනාව තුළදී මෙම කොටස් මනසට ගෝචර වන ආකාර පිළිබඳව මෙනෙහි කළ යුතුය
- ඇස අනුබද්ධයෙන් වර්ණය ලෙස, කන අනුබන්ධයෙන් ශබ්දය ලෙස, නාසය අනුබද්ධයෙන් ගන්ධය ලෙස, දිව අනුබද්ධයෙන් රස ලෙස, ශරීරය අනුබද්ධයෙන් ස්පර්ශය ලෙස ය
- දුරින් ඇති විට ළඟින් ඇති විට, අතීත ලෙස අනාගත ලෙස, ආරෝහණ අවරෝහණ ලෙස කුඩා විශාල ලෙස ආදී නොයෙකුත් න්යායන්ගෙන් මෙනෙහි කළ යුතුය
- මේවා මෙනෙහි කරමින් තම එදිනෙදා වැඩ කටයුතු වලට සම්බන්ධ කරමින් කාලය ගත කළ යුතුය
- වැටහීම් සිදුවන්නේ නිරායාසයෙනි
- මෙමඟින් ප්රඥාව උපදින අතර නිර්වාණය සාක්ෂාත් වීම පිණිස ප්රබල වූ හේතු ධර්මයන් සකස් වනු ඇත
No audio available
395. ඇඳිරිය
- තථාගත සම්මා සම්බුදුවරයෙක් පහළ වන්නේ ඉතා දුර්ලභවය
- ඒ තථාගත ධර්මය ඇසීම සඳහා දුර්ලභ මනුසත් බව ආදී භවයක් මෙන්ම යම් නොවැසුණු මානසික තත්ත්වයක් සත්වයා සතුව පැවතිය යුතුය
- යන්ත්ර මන්ත්ර ශාස්ත්ර තුළදී බන්ධනයක් සිදුකර එය කැපීම අපහසුවීම පිණිස එය නොපෙනෙන පරිදි ඇඳිරියක් දැමීම සිදුකරයි
- එලෙසම සත්ත්වයාගේ ක්ලේශයන් ඉවත් කිරීමට තථාගත ධර්මයක් ඇසුන ද එය නොඇසුනාමෙන් සිටින්නේ සත්වයාගේ සිතේ තම අසරණ භාවය නොපෙනෙන ඇඳිරියක් පවතින බැවිනි
- තමා සියල්ල දන්නේ යැයි, තමා පොර යැයි ආදී ලෙස සිතන අයෙකුට එසේ සිටීම ධර්මයක් නොවැටහීම පිණිස ඇඳිරියක් ලෙස ක්රියාත්මක වේ
- බොහෝ විට ධර්මය ප්රතික්ෂේප වන අතර ධර්මයක් ඇසීමට සිත් දෙන්නේ නැත
- අසීමිත ආශාවන්, අධික කෝපය, කම්මැලි භාවය, පොරත්වය, මෙන්ම පින් මද භාවය නිවන ආවරණය කරන ඇඳිරියක් ලෙස ක්රියා කරයි
- එලෙසම මුදල්, වත්කම්, නිරෝගි මදය, රෝගී භාවය, කර්ම විපාක, පිරිස් බලය ආදීය ද නිවන් මාර්ගය විවෘත නොවන තවත් ඇඳිරීන් විය හැකිය
- අපට ද ඕනෑම වෙලාවක ඒවා ක්රියාත්මක විය හැකි බැවින් ඒවා දුර්වල මේ මොහොතේ වහ වහා නිවන් මාර්ගය සම්පූර්ණ කළ යුතුය
No audio available
394. එපමණකි
- අඹ ගෙඩිය යනු අඹ ගෙඩියකි. එපමණකි
- ඇටය ඇත. මදය ඇත. පොත්ත ඇත. ක්රියාවලීන් ඇත. නමුත් එපමණකි
- අඹ ගෙඩිය තුළ මේරීමේ ක්රියාවලිය, යම් පලුද්දක් සිදුවුවහොත් එයට අනුවර්තනය වීමේ ක්රියාවලිය ආදී බොහෝ ක්රියාවලින් ඇත. නමුත් සත්ව පුද්ගල භාවයක් එහි නැත. ඒ හෙයින් එපමණකි
- බොහෝ ක්රියාවලින් අන්තර්ගත සත්ත්වයා යනු ද එසේය
- ආයතන ක්රියාකාරීත්වයක් පවතින්නේය. නමුත් එයද සොබා දහමේ පවතින ක්රියාවලියක් මෙන් එහි දියුණු තත්ත්වයකි. පුද්ගල භාවයක් පැනවිය නොහැකිය
- පෙනෙන්නේය. ඇසෙන්නේය හැඟෙන්නේය, දැනෙන්නේය. නමුත් ඒවා සොබා දහම තුළද දක්නට ලැබෙන්නේ ය
- ශාක පත්ර හිරු එළිය දෙසට හැරීම, නිදි කුම්බා කොළයකට දැනීම සහ ප්රතිචාර දැක්වීම ආදී කාරණයන් උදාහරණය
- එම නිසා දැකීමකි, එපමණකි, ඇසීමකි එපමණෙකි, දැනීමකි එපමණකි, ලෙසය. පමණ ඉක්මවා යන පුද්ගල භාවයක් එහි පැනවෙන්නේ නැත
- සත්වයා තුළ පවතින ආයතන ක්රියාකාරීත්වය ද සොබා දහම තුළ පවතින තවත් එක්තරා ක්රියාවලියක් පමණි. පුද්ගල භාවයක් නැත. ඒ හෙයින් එපමණකි
No audio available
393. උපන්දිනය
- උපන් දිනයක අවුරුද්ද මාසය දිනය පැය විනාඩිය තත්පරය ලෙස බොහෝ කොටස් පවතී
- නමුත් අප සැමරීම සිදු කරන්නේ දිනය පමණකි
- එය එසේනම් උපන් තප්පරය ලෙස සැමරීම ක් සිදු කළ හැකි විය යුතුය
- උපන් විනාඩිය ලෙස, උපන් පැය ලෙස සැමරීම සිදු කළ හැකි විය යුතුය
- තවද උපන් මාසය ලෙස අදාළ මාසයේ ම සැමරීම සිදු කළ හැකිය
- නමුත් අවුරුද්ද නැවත මුල සිට ආරම්භ නොවන බැවින් අවුරුද්ද සැමරීම කළ නොහැක
- තවද උපන්නේ රාත්රියක නම් සෑම රාත්රියම සැමරීම සිදුකළ හැකිය
- උපන්නේ වැසි වෙලාවක නම් වැසි වහින සෑම අවස්ථාවක්ම සැමරීම සිදු කළ හැකිය
- මෙසේ උපන්දිනය යනු දෘෂ්ටියක් වන අතර එය එසේනම් ඉහත සියලු ආකාරයෙන් සැමරීම් සිදුකළ හැකි විය යුතුය
No audio available
392. ලෝකය නිවැරදිය
- ලෞකික සිත තුල මෙසේ විය යුතු යැයි ද, මෙසේ නොවිය යුතු යැයි ද, පනවා ගත් කාරණා ඇත
- ඵවැනි යමක් සිත කැළඹීමට හේතු සකස් කරනු ලබයි
- නැතහොත් විය යුතු දෙයක් නොවිය යුතු ලෙස ද නොවිය යුතු දෙයක් විය යුතු ලෙස ද සිතීම සිත කැළඹීමට පත්කරයි
- දෙයක් සිදුවන්නේ සිදුවිය යුතු නිසාය. සිදු නොවන්නේ සිදු නොවිය යුතු නිසාය
- මෙලෙස ලෝකය නිසි ආකාරයෙන් ම පවතින්නකි. ගැටුම් හට ගන්නේ ඒවා සිතට එකඟ නොවන ලෙස සිදුවීමෙන් ය
- ලෝකය මෙසේ සිදුවිය යුතු යැයි සිතුවද එසේ සිදුවන්නේ නැත. මක්නිසාද හේතු සකස් වී ඇත්තේ එම සිදුවන දේ සඳහාම ය
- මේ ආකාරයට ඒ ඒ හේතුන් හමුවේ සිදු වුණ සියල්ල ඒ මොහොතේදී නිසි වූ දෙයයි
- එම නිසා සිදුවන සියල්ල ට එකඟ වීම, ඒවා දරා ගැනීම ධර්මයේ හැසිරෙන්නෙකු තුළ පැවතිය යුතු ගුණයකි
No audio available
391. සිතුවිලි ලෝකය
- අප කිසිදු රූපයක් දැක නොමැත. කිසිම ශබ්දයක් අසා නොමැත. හොඳින් බලන විට අපට ගෝචර වී ඇත්තේ ඒවා නිසා ඇති වූ සිතිවිලි පමණි
- ඇසට රූප පෙනීම සිදුවේ. අතීත දැනුම ද එම රූපය ද අනුව සිතිවිල්ලක් (හේතු ප්රකාරව) හට ගනී. ඉන් පසු එම සිතිවිල්ල හඳුනා ගැනීම සිදුවේ
- ඇත්තෙන්ම හඳුනා ගනු ලබන්නේ ගන්නේ රූපය නොව එම රූපය සම්බන්ධව ඇතිවූ සිතිවිල්ල යි
- එනම් රූප ලෙස අපට ගෝචර වන්නේ හුදෙක් සිතිවිලි ය
- එසේම අප හඳුනා ගනු ලබන්නේ කනට ඇසෙන ශබ්ද නොව එම ශබ්ද සම්බන්ධයෙන් ගොඩනැගුණු සිතිවිලි ය
- මේ සියලු ආයතන සම්බන්ධයෙන් අප හඳුනා ගනු ලබන්නේ සිතිවිලි පමණකි
- කිසිම රූපයක් ශබ්දයක් ගන්ධයක් ස්පර්ශයක් සෘජුව සිතට ස්පර්ශ වන්නේ නැත
- අපට ඒවා දැනෙන්නේ සිතිවිලි ලෙසය
- ඇත්තෙන්ම ලෝකය ලෙස අපට ගෝචර වන්නේ සිතිවිලි ගොන්නක් පමණි
No audio available